Эм иги спортчугъа саналгъанды

Абхазия республиканы Пицунда шахарында боксдан ХХIХ халкъла аралы эришиу бардырылгъанды, ол СССР-ни спортуну устасы Георгий Блабны хурметине аталып къуралгъанды. Анга Россейни 20-дан аслам регионундан, Абхазиядан бла Юг Осетиядан аслам жаш спортчу къатышханды.

16-17-жыллыкъланы араларында Элбрус районну «Эльбрус» спорт школундан Аслан Шавердинов жетишимли болгъанды. 80 килограммгъа дери ауурлукъ къауумда сермеше, ол юч тюбешиуюнде да къаршчы спортчуланы хорлагъанды. Эм алгъа, судьяланы бирча оноу этиулери бла Юг Осетияны келечисин къытханды, финал ючюн сермешинде биринчи раундда окъуна Липецкден боксчуну хорлагъанды. Ахыр тюбешиуюн да болжалдан алгъа бошагъанды. Алтын майдалны алгъанындан сора да, жерлешибиз эришиуню эм иги боксчусуна саналгъанды. Аны тренерле Балаланы Илияс бла Гергъокъланы Ахмат юйретедиле.