Ёксюз студентлеге – ахча болушлукъ

 Къабарты-Малкъарда ёксюз 2815 студентге Социал фонддан пенсия тёленеди, ала барысы да очный амал бла окъуйдула, жыл санлары 18-22 жылды. Къыралны жанындан болушлукъну бу тюрлюсюн алыр ючюн, ала очный халда окъугъанларыны юсюнден справканы келтирирге керекдиле. Бу жумуш бир кере, окъуугъа киргенде, толтурулады, артда жыллада данныйлени фонд окъутуу учрежденияла бла байламлыкъла жюрютюуню чегинде аллыкъды.

 Справка бла бирге студент пенсияны жангыдан тёлеп башлауну юсюнден (аны окъургъа 1 сентябрьде алгъан эселе) неда ол бир тюрлю сылтау бла окъууну талай заманнга тыйгъан эсе, тёлеуню  къабыл кёрюуню юсюнден заявление жазаргъа керекди. 18 жылы толгъан эсе, ахча аны атасыны неда анасыны угъай, кесини счётуна келликди. Заявленияланы барысын да къырал жумушланы порталында эм Социал фондну клиент службасына барып толтурургъа жарайды. 

 Студент окъуй тургъанлай ишге киргенликге неда академия отпускга кетгенликге, ол санда аскерге чакъырылгъаны бла байламлы да, тёлеуле тыйыллыкъ тюйюлдюле. Алай ол заочный неда ингирги халда окъуп тебиресе, окъугъан жеринден къысталса, пенсия андан ары тёленирик тюйюлдю.

Сора, законодательствогъа кийирилген тюрлениулеге кёре, пособияны бу тюрлюсю жай каникулланы кезиуюнде да берилгенлей турлукъду. Эндиге дери солугъан айларында студентлеге ахча тёленмегенди.