Даулукъ журт

Адамгъа къартлыкъ соруп келмейди. Сакъламай тургъанлай жетеди, биргесине уа – къарыусузлукъ бла онгсузлукъ да.

Аслижанны бла Мариямны фатарлары бир бири къатларында орналып эдиле. Мариям жашы Азрет бла жашай эди. Аслижанны сабийи болмагъаны себепли, ала къоншу тиширыугъа бек иги болгъандыла. Аны тышына чыгъып кёрмесе, Мариям терк окъуна кёре барып, ашына-суууна къарап, керек дарманларын да сатып алып келе эди. Азретчик да анга амма деп, кёлюн ала эди. Аны сабийни къолундан туту айланнганын кёрселе, бирле сёз этерге да кюреше эдиле. Ала ийнанмай эдиле Мариям анга таза ниетден къарагъанын.

Бир къауум замандан а Аслижан ахшыма, аманыма да табылгъан быладыла да, юйюм да былагъа къалсын деп сагъыш этип, нотариусха барып, несин да Азретчикни атына кёчюреди. Къагъытланы шёндюден хазыр этгенлиги ючюн, артыкъ ёлмезлигин ангылай эди тиширыу. 

Не букъдурур кереклиси барды, Мариям ол ишге бек къууанды. Алай сейирле уа энди башлана эдиле. Ким кир кёзден къарады аланы жууукълукъларына? Кимге эм не себепден жарашмады эки жарлы тиширыуну насыплары?

Энди бютюн жууукъ болурла деп турсала, орталары бла къара киштик ётгенча бола башлады. Аслижанны хар айтхан сёзюнде Мариямгъа башха магъана эшитиле эди. Мариямны сёзлеринде уа: «Мени ёлюрюмю сакълап турады. Теркирек битсем сюеди», -дегенча кёрюнеди. Алай бла татлы къоншуланы аралары гурушхалы болады.

Аслижанны биргесине бир талай жыл ишлеп тургъан Нюржанны фатары да къоншу юйде эди. Ол баш иеси эм эки жашы бла жашай эди. Эри тюрлю-тюрлю ишледе ишлеп айланнганлыкъгъа, къолайлары уа осал эди. Алай бла, ол эки тиширыуну араларында болумну сезгенлей, Аслижаннга жюрюп, Мариям тамамлаучу жумушланы кеси этип башлады. Сора кюнлени кюнюнде уа тиширыу: «Мен фатарымы Азретге жаздырыргъа ыразылыгъымы билдирип, къагъытлагъа къол салмагъанма»,- дегенни айтды. Унутхан болур эди ауруулу къарт къатын къагъытланы кеси ыразылыгъы бла жарашдыргъанын.

Аслижан ёледи. Сора жарым жылдан аны мюлкюне иеликге кириу бла байламлы сюд башландыла. Бу ишни юсюнде Мариям жанлы болгъан оноулан чыкъдыла. Алай Нюржан а фатар ючюн талашханын къоймайды. Ол Аслижан сау кезиуде, заманын бошуна жибермегенди. Саусузну тюбюнден-башындан кирип, аны осуят къагъытын кесини атына жаздыргъанды. Алай ол жумуш башха нотариусда этилгени себепли, Мариямны ол затны юсюнден хапары болмагъанды.

Нюржанны къазауат этип кюрешгенин да ангыларчады. Эки жашы жетипдиле. Эки отоулу фатар артыкъ боллукъ тюйюлдю. Ма алай бла Аслижанны фатары аланы араларында уллу дау чыгъаргъанды.  

Былайда ким тюз, ким терс болгъанын ангыларгъа къыйынды. Аны бла байламлы сюд окъуна тийишли оноу чыгъаралмай, эки жылгъа жууукъ заман ётюп барады. Фатаргъа уа кирит салыныпды. Мариям да фатарны берирге унамайды. Нюржан да анга къаны къызып: «Бир аягъы бла ол дунияда тургъан къарт адамны алдап къол салдырып…» - дегенин тохтатмайды.