Табийгъатны сакълаугъа тийишли эс бурулурча

Кёп болмай  КъМР-ни къырал  бийик-тау заповеднигинде  Агъач мюлкде уруннганланы кюнюне жораланнган «Агъашчыла – табийгъатны къоруулаучулары» деген  чакъырыу акцияны эсеплерин чыгъаргъандыла. Аны юсюнден бизге КъМР-ни Бийик-тау заповеднигини экология эм жарыкъландырыу бёлюмюню таматасы Тогъузаланы Лейла билдиргенди.

Бу ишни магъанасы -  жамауатны  табийгъатха аяулу кёзден къараргъа тюшюндюрюудю, жаш тёлюню экологиягъа эс бурурча  ёсдюрюудю, агъач мюлк бла байламлы усталыкъланы сайларча этиудю.

 Быллай акцияла  сабийлени чыгъармачылыкъ  хунерлерин ачыкъларгъа болушадыла. Алагъа, хар замандача, мектепледе эм маданият аралада ишлеген  экология бла байламлы  кружокла  тири къатышадыла. Ол санда къырал  бийик-тау заповедникде да сабийлени жарыкъландырыугъа аслам эс бурулады.  Анда кёп жылланы ичинде  школчуланы билимлерин, сынамларын кючлерча, ала табийгъатны багъалай билген инсанла болуп ёсерча уллу иш бардырылады. Жылны узунуна байрамлагъа, белгили кюнлеге жораланнган тюрлю-тюрлю акцияла ётдюрюледиле.

Бу жол акциягъа Къабарты-Малкъарны мектеплеринден эки жюзден аслам окъуучу къатышханды.  ВКонтакте социал сетьни хайыры бла уа  анга онсегиз минг адам къошулгъанды. 

Жаш адамланы конкурсха тири  къатышханларын белгилерчады. Болсада хунерликлери  бла айырмалы болгъанла да  белгиленнгендиле. Алай бла,  биринчи жерлеге Нальчикни 8-чи, 11-чи, Кёнделенни, Атажукинону,  Жемталаны,   Кахунну,  Анзорейни 1-чи номерли школлары, Бабугентни «Чинарик» сабий сады тийишли болгъандыла.