Эл мюлкню айнытыуну къайгъысын эте

Къабарты-Малкъар къырал аграр университетде «2017-2030 жыллада эл мюлкню айнытыу жаны бла илму-техника программаны тамамлауда жангы амал» деген ат бла «тёгерек стол» ётгенди. Анга вузну устазлары, магистрантла, аспирантла да къатышхандыла.

Агрономия факультетни башчысы Беслан Бесланеев ал сёзюнде бу теманы магъанасы уллу болгъанын чертгенди. Ол айтханнга кёре, илму ишни тирилтиуню хайырындан бизни къыралда эл мюлк производство айнырыкъды, илму-техника айнытыу ахшы эсепле кёргюзтюп тебирерикди, импортну алышыу жаны бла да болум игиленирикди.

Жыйылыуда бир ненча доклад окъулгъанды. Ол санда: «Илму-техникалы программаланы эмда проектлени жарашдырыу эмда бардырыу», «Битимчиликде инновациялы технологияла», «Аграр университетни алимлерини селекцияда эмда генетикада жетишимлери», «Къыралны аш-азыкъла жаны бла къоркъуусузлугъун жалчытыу» эм башхалары.