«Жетишимлени кёрселе, ата-анала сабийлени бизге келтиредиле»

2018 жылда Элбрус районда Этезланы Владимирни башламчылыгъы бла «Барс-Тырныауз» деген жангы клуб ачылгъанды. Анда всестилевой каратеге, къатыш единоборстволагъа (ММА) эм спортну талай башха тюрлюсюне юйретедиле.

- Ал кезиуледе, жарау этерге алай кёп адам келмеген чакъда, тренерлик ишни юй бийчем Виолетта бла бирге бардыргъанбыз, - дейди Владимир. – Клуб айный баргъаны бла мени тилегим бла бизге каратени WKF тюрлюсюнден спортну устасы Арсен Губашиев къошулгъанды, бусагъатда ол районда къатыш единоборстволадан баш тренерди. Бир кесекден тренерлени къауумуна ауур атлетикадан спортну халкъла аралы устасы Рагнета Карданова келгенди. Алай бла спортчуларыбызны сермешлеринде тюрлю-тюрлю техникаланы хайырланыргъа юйретирге онг чыкъгъанды.

Этезланы Владимир айтханыча, сабийлени клубха ата-аналары башха спортчуланы жетишимлерини юсюнден эшитгенлеринден сора кеслери келтиредиле. Бусагъатда жараугъа 120 сабий келедиле, аланы жыл санлары алтыдан башланады. Кюнню халы иги болса, юйрениуле шахар стадионда бардырыладыла, къалгъан кезиуледе – Тырныауузну В.Г. Кузнецов атлы мектебини спорт залында, аны ючюн тренерле школну администрациясына ыразылыкъларын билдиредиле. Клубда единоборстволаны талай тюрлюсю айнытылгъаны себепли, хазырланыу ишлеге эм сабийлени эришиулеге элтиуге тийишли федерацияла бла Россейни чемпионлары – къарындашла Тебуланы Мырза-Бек бла Тау-Бек, Беслан Мизов, Пятигорскну WKF каратеден тренери Денис Онищенко болушадыла.

Клубну келечилери эришиулеге къатышырча даражагъа терк жетгендиле, аладан жетишимле бла да къайтадыла. Аланы араларында Ангелина Лазаренкону белгилерге боллукъду, ары дери ол районну олимпиада резервли спорт школунда каратеге юйреннгенди. Ангелина спортну устасына кандидатны нормативин толтургъанды, ММА-дан башлап всестилевой каратеге дери спортну кёп тюрлюсюнден хорлагъанланы къауумуна киргенди. 11-жыллыкъ Эфендиланы Халида Къабарты-Малкъарны, Ингушетияны, Шимал Осетия-Аланияны, Ставрополь крайны биринчиликлеринде аслам майдал жыйгъанды. Халида СКФО-ну бла ЮФО-ну биринчиликлеринде да атын айтдыргъанды, Россейни биринчилигинде ючюнчю жерге чыкъгъанды. Къызчыкъны къатыш единоборстволадан жети чемпион бел бауу барды.

Эфендиланы Муслим россейли стандартлада аны ауурлугъуна тийишли къауум болмагъаны себепли кесинден 10-15 килограммгъ ауур спортчула бла сермешеди. Бу чурумгъа къарамай, ол саугъаланнганланы санына кирмей къалмайды. Алыкъа гитчеле болгъанлыкъгъа жетишимлери бла Сергей Нартенко, Уяналаны Ибрахим, Жолаланы Аиша бла Алий, Салима Салихова, Гамзата Гаджибеков, Жолабланы Сафия, Эльмира Кязимова къууандырадыла.

- Спортчуларыбызны барысын да белгилерге сюеме, - дейди Владимир. – Аланы барысын да алда алыкъа кёп хорлам сакълагъанына ишексизме. Клуб ишин районну Физкультура эм спорт комитети, Олимпиада резервли спорт школ бла байламлыкъда бардырады. Бирге эришиуле да къурайбыз. Сёзсюз, бизни барыбызны да жаш тёлюлени къарыулу, кючлю болуп ёсдюрюуню, эришиуледе районну атын къоруулаяллыкъ бийик усталыкъланы спортчуланы хазырлауну мураты бирикдиреди.