Тёртеуленни ахчасын урлагъанды

Тыш къыралладан бирини инсаны 72  жылдан 89 жылгъа дери тёрт тиширыуну алдап, ахчаларын урлагъаны ачыкъланнганды.

Нальчикде УМВД-ны следствие бёлюмю 19-жыллыкъ тыш къыраллыгъа ачылгъан уголовный ишни тинтип бошагъанды. Ол РФ-ни УК-сыны 159-чу статьясыны 3-чю кесегине бузукълукъ этгенине ишеклик барды, деп билдиргендиле бизге  УМВД-ны пресс-службасындан. Ол хыйлачылыкъ этгени ючюн жууапха тартыллыкъды.

Полициячыла ачыкълагъанларыча, жаш адам тёрт адабан тиширыуну алдагъанды. Ыннала билдиргенлерича, алагъа танымагъан адам сёлешип, право низамны сакълаучу болгъанын айтханды. Жалгъан полициячы жууукъ адамыгъыз авария этгенди, аны жууапха тартмаз ючюн ахча тёлерге керекди деп алдагъанды. Быллай сёзледен къоркъуп, тиширыула ахча излеп келген адамгъа сомларын биргендиле. Аланы алдагъанларын а жаланда жууукъ адамларына сёлешгенден сора ангылагъандыла. Алай бла алагъа этилген битеулю къоранч 575 минг сомгъа жетгенди.

Излеу-тинтиу жумушла толтуруп, полициячыла  хыйлачылыкъ этгеннге ишекли адамны тутхандыла. Ол тыш къыралладан бирини 19-жыллыкъ инсаныды. Ол айтаныча,  интернетде ишлерге адам изленнгенини юсюнден билдириуню табып, анга жууап бергенди. Алай бла анга белгили этилген жерге барып, ахчаны алып, аны банк картагъа салыргъа кереклисин юйретгендиле.

Жаш адамны аманлыкъгъа тартхан белгисиз инсаннга терслеу материалла ачылгъандыла. Ол кеси уа тутулгъанды. Тиширыулагъа этилген къоранч артха къайтарылгъанды.

Уголовный иш сюдню къараууна берилгенди.