Къагъанакъланы арасында ёлгенлени саны азайтылгъанды

Къабарты-Малкъарны Перинатал арасы бюгюнлюкде жетишимли ишлеген медицина учрежденияладан бирине саналады.  Ол шартны Санкт-Петербургну  педиатрия жаны бла  медицина  университетини ректору,  Россейни штатда болмагъан специалисти-неонатологу Дмитрий Иванов да белгилегенди.

Бу  жол ол ишчи жолоучулугъуну чеклеринде республикада   къагъанакъла бла сабийлеге медицина болушлукъ къалай берилгени бла шагъырейленирге келгенди. Аны чеклеринде  Перинатал арада    къыйын клиника болумлагъа да аслам  эс бургъанды.   
- Регионда къагъанакълагъа багъыу бла байламлы болум иги да тюрленнгенди.  Сёз ючюн, Перинатал арада   ауурлукълары килограммгъа жетмеген  балаланы 90 процентин сау-саламат къалдырыргъа онг табылады.  Учрежденияны жетишимли ишлегенин ачыкълагъан баш шартладан бири баланы ёлюмден къутхарыргъа онг табылгъаныды, - деп билдиргенди Дмитрий Иванов.
Былтырны эсеплерине кёре, Къабарты-Малкъарда къагъанакъланы арасында ёлгенлени саны 28 процентге азайтылгъанды. Алай бла бир тюрлю сылтау бла минг адамдан жаланда ючеулен ауушханды. Ол къыралда орта эсепден иги да азды.
 Аны баш сылтауларындан бири ауурлукълары болгъан эм къыйналыргъа тюшген  тиширыула заманында перинатал арагъа тапдырылгъанлары ахшы себеплик этеди. Бийик медицина технологияланы хайыры бла ананы эм баланы да саулугъуна  заран жетмезча мадар этиледи.

Перинатал арада болжалларындан алгъа тууаргъа тюшген эм саулукъларында бир тюрлю кемчиликлери болгъан   сабийлени жашауларын сакъларча  къыйын операцияла да этиледиле.  Алай бла 2018 жылдан бери онбеш къагъанакъны сокъурлукъдан къутхарыргъа онг табылгъанды. Эсге сала айтсакъ, арт заманлагъа дери аллай операцияланы этерге   федерал аралагъа жиберип тургъандыла.

 -Педиатрия арада ауурлукълары болгъан тиширыулагъа, къагъанакълагъа да тийишли медицина болушлукъ бериледи эм бу жаны бла иш  жетишимли барады.  Болсада мындан арысында   да республикада саулукъ сакълауну бютюн иги даражагъа кётюрюрча Педиатрия  университет не жаны бла да коллегаларына болушургъа хазырды - деп къошханды   Дмитрий Олегович.