Чегемден Нальчикге дери – велосипед жол

Чегем районда бу кюнледе хайырланыугъа эки спорт объект берилгенди – «акъыллы» спорт майдан бла велосипед жол. Ала саулукъ жашау бардырыуну ниетлерин жайыу, физкультура бла асламлы спортну айнытыу мурат бла ишленнгендиле.

«Акъыллы» спорт майдан «Бизнес-спринт (Мен спортну сайлайма!)» федерал проектни тамамлауну чегинде салыннганды, анда шёндюгюлю излемлеге келишген эшик тренажерла, футбол, баскетбол эм волейбол  ойнарча жерле, чабарча жолчукъ да бардыла. Ачылыу болгъан кюн а алада шуёхлукъ матчла да ётдюрюлгендиле.

Жангы велосипед жолчукъну уа биринчи 70 спортчу сынагъандыла, алагъа эсде къалырча саугъала берилгендиле. Бу жол бла велосипедчиле Чегемден Нальчикге дери жетерикдиле, деп билдиредиле республиканы Спорт министерствосундан.

Кульчаланы Зульфия.
Поделиться: