Ариу чыгъармалары бла усталаны сейирсиндиреди

Халкъыбызны ёсюп келген жаш тёлюсюню арасында усталыкълары, фахмулары болгъанла аз тюйюлдюле. Аланы санына Геграланы Асият да киреди. Ол къол усталыкъ бла эрттеден бери кюрешеди. Аны ишлерини тамашалыкълары тюрлю-тюрлю кёрмючледе  къараучуну не заманда да сейирин къозгъамай къоймайды. Аныча къызларыбыз миллетибизни маданият энчилигин, байлыгъын сакъларча себеплик этгенлерин айтыргъа тийишлиди. Ол чыгъармалада халкъны жашауу, солуу, чемерлиги, хунерлиги туурадыла.

Школдан сора юрист болургъа сюйгенликге, анасыны оноуу бла КъМКъУ-да декоративно-прикладной искусство и народные промыслы деген факультетге киреди. Бюгюнлюкде аны сайлагъанына сокъуранмагъанын, ишин жюреги бла сюйгенин айтады. Усталыгъы бла да кёплени сейирсиндиреди. Агъачдан, темирден , кюмюшден, минчакъладан этген чыгъармалары республикада къуралгъан кёрмючледе терк-терк кёрюне турадыла. Аны бла чекленмей, суратла да ишлейди. Окъууну бошай тургъан заманында графити бла А.Пушкинни назмуларына кёре сурат хазырларгъа иш бередиле. Ол а аны хар жомагъындан да энчи сюжетин алып,  бир кечени ичине ариу чыгъарма къурайды. Устазлары аны тамашалыгъына сейирсинип, ишин артха берирге унамай, университетде къоядыла. Ызы бла уа КъМР-ни Башчысы Юрий Коков КъМКъУ-гъа келгенинде анга саугъагъа берген эдиле.  Бюгюнлюкде къызны аллай тамаша ишлеринден онусу барды. Аланы хар бири да энчи сезими бла байламлыдыла.

- «Жукълап тургъанлай тюшюмде бир оюм келсе, туруп аны ишлеп башлайма, сора тындыргъынчы къатындан кеталмайма»,- дейди ушакъ нёгерим.  Бюгюнлюкде ол окъууун бошап, ишин юйюнде бардырады. Хунерлигин жаратып, адамла кёп заказла этгенлери себепли уа Интернет-студия ачханды. Келинчикле тойларына, школну бошагъанла выпускной баллагъа бир башхагъа  ушамагъан ариу жыйрыкъла киерге сюйгенлери себепли, уста къыз, кесини оюмун айтып, чепкенлерин да ариу ташла бла жасайды. Сюйгенлеге коронала, билезикле, сыргъала да этеди. -«Бир сейир зат ишлеп аны кесим бек жаратып къойсам, берип иерге болалмай, дагъыда аллай бирин этеме»,- дейди. 

Хар ишин а ол сайтда салады. Аны себепли кеслерине энчи затла этдирирге сюйгенлени санлары кёбейип барады. Бу студияны ачханыны сылтауларындан бири уа, мындан ары быллай къол усталыкъ тас болуп къалмай, бу ишге фахмулары, итиниулери болгъанланы санын ёсдюрюудю.

Быллай затла бла юйлеринде кюрешген жаш адамла Шимал Кавказда аз болмагъанын чертеди Асият. Жарсыугъа, аланы алыкъа хазна танымайдыла. Бу Интернет- студияда уа барысыны да ишлерини суратларын жыйышдырып, фахмуларын адамлагъа билдирип, чыгъармалары сатылырча себеп боллугъун излейди. Аны бла чекленмегенлей, хунерли  сабийлеге кружокла ачып, бу ишге юйретирге мураты барды. Аны себепли педагог-психологга окъуй турады. Быйыл бардырылыкъ «Машукда» да кесини проектин кёргюзтюрге муратлыды.

Мындан ары энчи дизайн бла жонулгъан, тукъум тамгъасы болгъан шинтикле, баш аула да этерге сюеди.  Бюгюнлюкде уа кийиз бичип башлагъанды.

- Окъугъан заманымда дерсде  «Ковер из Бароды» дегенни юсюнден эшитеме. Аны Индияда Бародада жашагъан махараджа  Мухаммат файгъамбарны къабырына салырча инжиледен, накъут- налмасладан сырдыргъан эди. Ол мени бек кёллендиреди. Бусагъатда ушатып этген кийизими  жартысын тамамлагъанма, анга жети мингден артыкъ минчакъ кетгенди. Къысха заманда аны бошаргъа деп турама,- дейди Асият.

Чыгъармаларын кёп белгили устала жаратханы себепли уа, келир жыл Нальчикде Суратлау искусстволаны А. Ткаченко атлы музейинде кёрмюч къурап, ишлерин кёп адамгъа танытыргъа  мураты барды.