Энергетикада тарифлени жыл сайын биринчи декабрьде тохташдырлыкъдыла

Аны юсюнден монополиялагъа къажау федерал службаны (ФАС) башчысы Максим Шаскольский Битеуроссей тариф конференцияны кезиуюнде айтханды алгъаракъда. Ол оюм этгеннге кёре, иш алай болса, энчи инвестицияла келтириу жумушланы тийишдирирге, аланы тамамлаугъа да контрольну кючлендирирге боллукъду.

Ведомствону башчысы дагъыда РФ-ни Правительствосу эмда ФАС тарифлени тийишдириу жаны бла не зат этгенлерин билдиргенди. Сёз ючюн, регионда эм уллу сетевой организацияны электрокюч оборудованиясыны ишин жалчытыугъа этиллик къоранчланы мардасын тохташдырыргъа чакъырылады. Аны хайырындан ала азайтыллыкъдыла, монополияланы ишлери да бир тюрсге келтирилликдиле, дегендиле КъМР-ни Тарифле эмда жашау журтлагъа надзор этиу жаны бла къырал комитетинде.

Законодательствогъа кийириллик тюрлениуле инвестиция программаланы жарашдырыргъа, электрокюч бла жалчытыу схемаланы къураргъа эмда гражданланы коммунал жумушла ючюн тёлеулерини индекслерин тохташдырыргъа себеплик этерикдиле. Аны хайырындан а жашау журт-коммунал мюлк бёлюмде инфраструктурагъа аслам инвестицияла келтирирге боллукъду.

Инвестициялы программаланы жыл сайын тюзетиу 20 июньнга кёчюрюллюкдю. Ол толтурулмаса, 1 июльда тарифле да тюрлендирилликдиле.