Келир жылгъа – миллиондан артыкъ терек

«Единая Россия» битеуроссей политика партияны къырылгъан агъачланы орунларына жангыларын къурау жаны бла акциясына кёре 2020 жылны жайына миллиондан артыкъ терек орнатыллыкъды. Ол иш жылыракъ регионлада быйылны  сентябрь-октябрь айларында окъуна  башланырыкъды. Биринчи болуп акциягъа Сибирьни, Узакъ Кюнчыгъышны эмда Север-Запад федерал округну регионлары, ол санда Хабаровск, Забайкальск, Приморск, Красноярск эмда Алтай крайла, Алтай, Бурятия эмда Карелия республикала, Амур, Иркутск, Омск, Томск, Новосибирск, Архангельск эмда Новгород областьла къошуллукъдула.

-Иркутск областьда, Красноярск эмда Забайкальск крайлада, Бурятияда бла Якутияда   агъачлагъа отдан уллу халеклик салыннганды, юч миллион гектардан асламы кюйюп кетгенди. Ма ол тийреледе терекле жангыдан ёсер ючюн онла бла жылла керек боллукъдула. Къыралыбызны жеринде агъачлагъа жангы жашау берир ючюн къолубуздан келгенни аямазгъа керекбиз. Кёп да бармай «Единая Россияны» келечилери жылыракъ регионлада терекле салыу жаны бла акцияны башларыкъдыла, жаз башында уа аны андан ары бардырлыкъдыла.  Битеу да тюрлю-тюрлю терекледен миллиондан аслам орнатыргъа белгиленеди,-дегенди Къырал Думаны «Единая Россияны» фракциясындан депутаты Александр Якубовский.

Ол билдиргеннге кёре, бу ишде Рослесхозну эмда жер-жерли агъач мюлклени эсгертиулери бла  юйретиулери  эсге алынырыкъдыла. «Агъачланы жангыртыу терк барыр ючюн, кёп шартны, ол санда хауа болумланы эмда жерлени хазыр болгъанларын бла къалгъанларын, эсге алыргъа тийишлиди. Къол бла салыннган тереклеге энчи халда къараргъа кереклисин, Сибирьни отну хатасы жетген агъачларында уа алай этерге онг болмагъанын эсге алып, партия агъач мюлкле хазырлагъан жерледе терекле салыуну дурус кёреди. Алай бла, ёсюмлюкле от артыкъда уллу халеклик салгъан  20-гектарлыкъ участкалада орнатыладыла»,-деп ангылатханды депутат. 

-Мындан ары уа «Единая Россия» жаш тереклени сакълау, законсуз агъачны къырыуну тохтатыу жаны бла бек уллу иш бардырыргъа таукелди. Артыкъда эркинликсиз тереклени кесиуге контрольну кючлендирликди, нек дегенде ма олду от тюшюуню баш сылтауу. Агъачны законсуз къыргъанла, башларын жулур ючюн, от салып кетген шартла белгилидиле,-деп чертгенди Якубовский.

«Единая Россияны Жаш Гвардиясыны» координация советини таматасыны орунбасары Егор Литвиненко уа бу жаш тёлю организацияны регион бёлюмлеринде шёндюден окъуна эко-волонтёр штабла ачылгъанларыны  юсюнден билдиргенди. «Гитче тереклени жылны эки уллу болмагъан кезиуюнде орнатсанг игиди – апрель-майда бла сентябрь-октябрьде. Къалгъан заманлада жашагъан тийрелерин жашиллендирирге сюйгенледен заявкала жыйыу бла кюреширикбиз. Дагъыда отдан уллу хата тюшген агъачланы жангыртыргъа барлыкъ волонтёр отрядла да къураллыкъдыла»,-дегенди ол.

 

Юсюпланы Галина.
Поделиться: