Къыйматлыкъны бла монглукъну кезиулю байрамы

Кюз артыны келгени бла байламны, анга тюбегенде бардырылгъан байрамланы кезиулери да жетеди. Аны бла байламлы 21 октябрьде Къабарты-Малкъарны Владимир Вороков атлы культура фондунда «Тбилисоба» аты бла тирлик жыйыуну байрамы белгиленнгенди. Аты да айтып турады, бу жол фондчула этген байрамны баш жигитлери республикада гюржю миллетни «Риони» атлы миллет маданият араларыны болгъанларын. Тёреде бола келгенича, жыйылыугъа башха миллетли адамла да къошулгъандыла.

Къууанчн ыбашында айтылгъан фондну таматасы Люаза Макоева ачханды эм бардыргъанды.

- Тейрилени заманларындан келген бу байрам битеу да жер башында жашагъанлагъа тёрелиди. Алай а ол, бир магъананы тута эсе да, хар бир миллетде да кеси атын жюрютеди. Тирлик жыйыу, ызы бла ол огъурлу урунуу байрам къалай баргъанлары бла шагъырей боллукъбуз», – дегенди ол.

Биринчи сёз гюржюлени миллет араларыны таматасы Сергей (Дато) Кавлашвилиге берилгенди. Жамауат аны «Миллет ашы» деген тёрели кёрмючледен таныйды. Сергей Владимирович, ары келгенлени урунууну бу аламат байрамы бла алгъышлап, гюржюлюле жашау жолларында жер берген тирлик бла жашагъанларын, ала андан ненча тюрлю аш хазырлагъанларын санагъанды, кеси да аш этерге сюйюучюсюн билдиргенди.

«Риони» миллет маданият арагъа онеки жылны башчылыкъ этип кетген  Анзор Лобжанидзе бу байрамны юсюнден тынгылы хапар айтханды. «Тбилисоба» атлы байрам Гюржюде жыл сайын октябрьни биринчи солуу кюнлеринде бардырылады. Биринчи кере ол 1979 жылда белгиленнгенди. Бу жол а ол 44-чю кере бардырылады. Байрамны заманында Грузияда ярмаркала, концертле, спорт оюнла къураладыла. Тийишли адамланы саугъалаула барадыла. Къууанчны бир кесеги гюржю миллетни келечилери жашагъан башха жерлеге да кёчгенди. Алай кенг белгиленмей эсе да, бизде да тёрели болгъанды», – дегенди Анзор Борисович.

Андан сора Люаза Магометовна ары келгенлени фондну сыйлы къонагъы Улбашланы Светлана бла шагъырей этгенди. Светлана Исмаиловна «Урушну сабийлери» деген битеуроссей жамауат биригиуге таматалыкъ этеди. Ол дагъыда Нальчик шахарда коммунист партияны «Искра» атлы комитетини секретарыды. Бара тургъан байрамгъа тамата тёлюден сабийликде Уллу Ата журт урушну къыйынлыгъын сынагъанла чакъырылгъандыла. Светлана Исмаиловна аланы энчи махтау къагъытла, майдалла бла да саугъалагъанды. Анда ол адамлагъа кёп ариу сёз айтылгъанды.

Алда эсгерилгенича, къайсы миллетни байрамын да башха, къоншу, узакъ миллетлени келечилери жарыкъ этедиле. Бизде болгъан миллет араланы адамлары бир бирлерин бир да иги таныйдыла. Быллай кюнледе уа ала бир бирсиз бютюнда болалмайдыла. Гюржюлени байрамларына келген чувашлыла, бизде «Нарспи» атлы миллет культураны келечилери, аджар миллет тепсеуню кёргюзтгендиле. Кантемир Асеев а, Владимир Вороков атлы маданият фондну жаш адамла къурагъан бёлюмюню келечиси, къонакъланы «Тбилиси» деген жырны айтып къууандыргъанды.

Тюбешиуню ахырында къонакъланы миллет ашла бла сыйлагъандыла.