Огъары Чирик кёлледе – терк интернет

Кёп болмай «Ростелеком» компания бир километр бийикликде орналгъан  Огъары Чирик кёл туркомплексге  3,5 километр  чакълы  оптика кабель тартханды. Алай бла комплексде отуз бир   гитче къонакъ  юйчюкню цифралы  телевидение бла жалчытырча эм  Wi-Fi ишлерча   мадар этилгенди.

- Къабарты-Малкъарда  туризм кластерни айнытырча тийишли инфраструктура  къуралыргъа керекди. Ол санда  связь жаны бла къонакъланы излемлерин тапдырыргъа борчлуду. Бусагъатда солургъа келгенлени асламысы Интернетни иги ишлерине эс бурадыла эм сайлауры да анга кёре болады. Аны ючюн Интернет бла тынгылы жалчытыу баш магъананы тутады,-дейди «Ростелекомну» республикада  бёлюмюню башчысы Залим Хутов. 

Огъары Чирик  кёлледе комплекс Черек районда туризм кластерни айнытыу жаны бла  инвестициялы проектни чеклеринде ишленнгенди.  Аны къурамына къонакъ юйле,  Чабакъчыны журту, ресторан, спорт, сабий эм  административ корпус киредиле. Саулай алып айтханда, объектни уллулугъу  1,5 гектаргъа жетеди.

- Къонакъ отоулада цифралы телевидение ишлериги кёплеге асыу кёрюнюрюкдю. Энди  ала HD эм  4К форматда кинолагъа къараяллыкъдыла.  Ол себепден мындан арысында да келирге сюйгенлени санына  танг къошула барлыкъды. Биз да кесибизни жаныбыздан туристлени болумларын игилендирирча къолубуздан келгенни аярыкъ тюйюлбюз, - дейди Огъары Чирик кёл  комплексни таматасы Бёзюланы Махмут.

«Ростелекомдан» билдиргенлерине кёре, регионда   бюгюннгю связь бла битеу санатор-курорт объектле жалчытылыннгандыла.