Финансланы юсюнден айтырыкъдыла

Къабарты-Малкъарда жашагъанланы «Финтрек» деген онлайн-проектге къатышыргъа чакъырадыла. Анда финанс окъуулулукъдан жети вебинар бардырыллыкъды. Алагъа уа Россейни Ара банкыны, уллу компанияланы эмда белгили вузланы келечилери къатышырыкъдыла.

Биринчи дерс онсегизинчи октябрьде ётгенди. Анда Россейни Банкыны Миллет тёлеу система департаментини башчысы Алла Бакина цифралы сомну, ол инсанлагъа эмда бизнес бла кюрешгенлеге не жаны бла иги болгъаныны юсюнден хапарлагъанды.

Вебинарланы саны, айтханыбызча, жетиди. Къалгъанлары келир 29 ноябрьге дери кезиу-кезиу бардырыллыкъдыла. Алада экспертле страхованияны эмда кредитлени, цифралы сомну эмда финансла жаны бла оноула этиуню юслеринден жик-жиги бла айтырыкъдыла. Ушакълагъа къатышханла уа алагъа сорууларын берирге боллукъдула. Вебинарланы жетишимли ётгенлеге энчи сертификатла берликдиле.

Улбашланы Мурат хазырлагъанды.
Поделиться: