Белгили фильм – Бахсан ауузунда

Къабарты-Малкъарны Курортла эм туризм министерствосундан билдиргенлерине кёре, «Последний богатырь: Наследие» деген фильмни кёп кесеги бизде – Бахсан ауузунда «Къызны чач эшмелери» чучхурну, Акъ топуракъ ауушда, Комсомольский кёлню тийресинде бла Чегетде алыннганды. Жомакъны биринчи кадрларындан окъуна жерибизни ариу табийгъатын башха жанындан кёребиз. 

Баш жигитледен бири ойнагъан актриса Юлия Пересильд мында ишлеген кезиуюн эсгере, бу съемкаланы алыкъа кёп жылны унутмазлыгъын белгилейди. Режиссёр Антон Маслов а ала битеу Шимал Кавказны ётгенлерин, алыкъа адам аягъы басмагъан жерлени излегенлерин  айтханды.

«Наследие» сериал «Последний богатырь» фильмни баргъаныды. Аны сюжетине кёре баш жигитле Марья бла Софья Белогорьени бла аталары богатырь Иванны къутхарыргъа керекдиле.

Кульчаланы Зульфия.
Поделиться: