Налогла тёлеуню бютюн женгил амалы

Предпринимательство бла кюрешгенле налогланы  тынч амал бла  тёлеу система болгъанын биледиле. Кёпле ишлерин анга тийишлиликде бардырадыла. Энди уа алагъа аны бютюн женгил этгендиле. Федерал налог службадан билдиргенлерине кёре, ишлеринде онлайн-кассаланы хайырланыучу предпринимательле келир жылдан башлап  отчётланы кёп къалмай барындан да эркин этилликдиле. Ала тёлерик налогну, сагъынылгъан кассаладан келген информацияны  ФНС кеси тийишдирип тергерикди, ызы бла билдириу да жиберликди.

Сёзсюз, ол ахшы тюрлениудю дерчады. Кеси да шёндюгю технологияла сингдириле баргъаны себепли болгъан ишди. Бизнес бла кюрешгенле регистрацияны терк этиу, налогланы женгил тёлеу эмда инспекция бла да алай ушакъ бардырыу амаллагъа энчи магъана бередиле. 

Россейде сатыу-алыу бла кюрешген, алай бизни къыралда аберилери болмагъан интернет-компанияла  да унутулмагъандыла. «ФНС-ны интернет-сайтында «НДС-офис»  деген энчи сервис къурагъанбыз, - дегенди Федерал Налог службаны башчысыны орунбасары Дмитрий Сатин. - Аны хайыры бла тыш къыраллы компанияла регистрацияларын бери келе турмай этерге боллукъдула.  Алай бла ахыр эки жылны ичинде биз къыралны бюджетине (НДС бла) аладан 22 миллиард сом жыйгъанбыз. Жаланда былтыр аны ёлчеми онеки миллиарддан атлагъанды. Быйылны кёрюмдюлери уа андан да игидиле - биринчи кварталда налог тёлеучюлени бу категориясына киргенлени саны 1700 болгъанды (ары дери - 170), бюджетге уа 12,2 миллиард сом тюшгенди».

Улбашланы Мурат
Поделиться: