Бийик жетишимлери ючюн – сыйлы атла

Республиканы Башчысы Казбек Коковну оноуу бла физкультура бла спортну айнытыугъа салгъан уллу къыйынлары, болдургъан жетишимлери ючюн Мусукаланы Исмайылгъа бла Алина Пековагъа «Къабарты-Малкъарны физкультурасыны бла спортуну сыйлы къуллукъчусу» деген атла берилгендиле.

Мусукаланы Исмайыл эркин тутушууда жетишимлери бла белгилиди. Алгъаракълада ол Белградда дунияны чемпионатында, пуэрториканлы Себастьян Риверни айырмалы 11:0 эсеп бла хорлап, алтын майдалны къытханды. Алай бла Олимпиадагъа къатышыргъа эркинликни да къоруулагъанды. Исмайыл 2022 жылда Европаны чемпиону болгъанды, Россейни чемпионатларында майдалланы дайым къытханлай тургъанды.

Алина Пекова уа быйыл октябрьда бийиклиги 8021 метрге жетген Чо-Ойю таугъа ёрлегенди. Ол жарым жылны ичинде онбиринчи сегизминглик тауда – Аннапурна, Эверест, Лхоцзе, Макалу, Нангапарбат, Броуд-Пик, К-2, Гашербрум, Манаслу, Дхаулагири – болгъанды.