Аманлыкъчыла соруудан къутулалмагъандыла

Кёп болмай «Россети Северный Кавказ» – «Каббалкэнерго» биригиуню специалистлери Чегем шахарда  пластикден абериле чыгъаргъан фабрикада  аслам  ток урланнганын тинтгендиле. 

Рейдлени кезиуюнде энергетикле  предприятияда  токну эсеплеген приборну ишине чырмау салыннганын   ачыкълагъандыла. Анга кёре хайырланыучу  32,6 миллион сом багъасына 4,6 миллион  кВт сагъат урлагъанды.  Аны бла байламлы акт ич ишлени келечилерине берилгенди.

 Эсге сала айтсакъ, энергокючню  урлагъан  уллу хатагъа келтирирге боллукъду. Кеслери алларына къалай болса да тартылгъан  ток чыбыкъла   ёртеннге келтирирге, адамны саулугъуна хата салыргъа эм  къыйыры къоншулагъа окъуна жетерге боллукъду.

Алай бла токну урлагъанла Административ бузукъланы кодексини 7.19-чу статьясына тийишлиликде (Сетьлеге эркинликсиз къошулгъанларына эм токну эсеплеген приборсуз хайырланнганларына) тазир тёлерикдиле. Аны ёлчеми энчи иелилеге - 10-15 минг эм организациялагъа уа 100-200 минг сомгъа жетеди. Андан сора да, бир-бир аманлыкъчыла РФ-ны Уголовный кодексини 165-чи статьясына кёре эки жылгъа тутулургъа да боллукъдула.