Индиялы къонакъ кёргенин жаратханды, бийик багъа бергенди

РАН-ны КЪМР-де Илму арасыны таматасыны къуллугъун толтургъан Залимгерий Нагоев Инженерия жаны бла АНАНД халкъла аралы колледжни проректору профессор Правин Агарвал бла тюбешгенди. Къонакъны бери келиую – Фундаментал  тинтиулени россейли фондуну бла Индияны  правительствосуну илму эм технологияла жаны бла департаментини байламлыкъла жюрютюулерини хайырындан болгъан ишди. Аны юсюнден бизге  илму араны пресс-секретары Фатима Магомедова билдиргенди.

Тюбешиуню кезиуюнде илму жаны бла байламлыкъла бардырыргъа деп оноу этилгенди. Андан сора да алимлени билимлерин ёсдюрюр муратда  стажировкаланы да хайырланыргъа деп тохташдырылгъанды. 
Илму араны техника  онгларын кёрген  къонакъ  алагъа бийик багъа бичгенди. Кадр эм мюлк хазна Правин Агарвалны сейирге къалдыргъанды десек, ётюрюк болмаз. 

Экинчи кюн  а Прикладной математиканы бла автоматизацияны институтунда  халкъла аралы семинар ётгенди. Ол Правин Агарвал бла Арсен Псху къурагъан проектни чеклеринде бардырылгъанды. Анга, илму араны бла институтну къуллукъчуларындан сора да, Къабарты-Малкъар къырал университетни алимлери да къатышхандыла.